Содафнесыне шабатнень мокшэрзянь культурать мархта

Рузаевкать эзда аф ичкозе ули оцю мокшень веле, конань лемоц Сузгярьге. Тя велеса цебярьста ванфтовсть мокшень кяльсь, щапне-каряпне, сире пингонь моротне, койхне-обуцятне. Тяса трудонь кельги семьяса шачсь и кассь асу мокшавась, Рузаевка ошень 14№ идень садонь воспитательсь Надежда Николаевна Чугунова (Суркова), кона касфни афкуксонь патриотт. Лиякс азомс, мокшавать эряфоц вов ни лама киза сотф шабатнень мархта и тя тиендьсы сонь павазукс.

Мокшаватнень колга фалу ули мезе азондомс. Ламоса, пяк ламоса синь сафтсазь. Удалаф ломанць удалаф сембоса. Тяфтапнень ёткс сувси и Надежда Чугунова. Ёмластокиге тядяц и аляц тонафтозь стирть кельгома шачема-касома кяленц и культуранц.

— Сузгярьге велезе пяк мялезон. А кода аф кельгомс шачема-касома уженяцень, коса ётась павазу идькс пингце? Тяса сембось тейне мала, содаф эрь кинясь, шуфтонясь. Тядязе, Анна Федоровна, и алязе, Николай Васильевич, тонафтомазь мокшень кялень, щамонь-карямонь кельгома, коень-обуцянь ванфтома. Оцю лезкс тейне тяфта жа макссь Сузгярьге школань мокшень кялень и литературань тонафтысь Полина Алексеевна Зуева, ужяль, но тяниень пингть сон аш ни шиса, — азонды Надежда Николаевна. — А мзяра тонафнень стихта и лувондонь мокшень литературада, афи мяляфтса!? Тядязе покодсь велень библитекаса, сяс мон сидеста яксень тоза лувондома мокшэрзянь поэттнень и писательхнень стихснон и произведенияснон.

Афкукс, мокшень кяльть и койхнень-обуцятнень Надежда Чугунова ванфтсыне пяк цебярьста. Сузгярьгонь школать шумордамдонза меле, Надежда Николаевна ламос арьсема ашезь карма и поступась тонафнема М.Е. Евсевьевонь лемса Мордовскяй государственнай педагогическяй институту, филологическяй факультету. Саранскяйса васьфтезе мирденц, Иван Викторович Чугуновонь, и лиссь теенза рьвакс. Надежда — кельгома ава и тядя, мирденц мархта колма идьсна: Аня, Андрей и Матвей, и  кафта уноксна.

Мзярда тядятне-алятне вятьсазь шабаснон идень саду, синь пяк надияйхть, што тяса васьфтихть тевонь содай, идень кельги воспитательхть, конат аф обжасазь ёмла ломаннять, тонафтсазь ялга ёткса прянь вятема, мялень салай лама тевс. Тянь ширде пяк удалась минь тячиень героиняньке. Лама киза ни Надежда Чугунова покоди Рузаевкань 14№ идень садса воспитателькс.

Тя дошкольнай учреждениясь инь цебярьхнень ёткса ошсонк. Родительхне тястонь воспитательхнень колга корхнихть аньцек шнама валса. Тяса иттне тонафнесазь мокшэрзянь кяльснон, щамснон-карямснон кельгома, морама, эсь народснон историяснон содама.

Рузаевкань 14№ идень саду якай 100 шаба. Синь мархтост покодихть 11 тевонь содаф воспитательхть. Трудонь кельги коллективть вятьсы тевонь содай, козя опыт мархта мокшавась Татьяна Амбаева.

— Надежда Николаевна пяк шнама ломань, кельгома воспитатель, лама тевса сафтыхнень и кенерихнень эзда. Сон кельгсы шачема-касома веленц, кяленц, культуранц, коензон и обуцянзон. Оцю мяль вельде сон содафнесыне иттнень мокшэрзянь национальнай культурать мархта. Мушенды киня эрь шабать седис. Ламотненди сон содаф кода творческяй асу ломань, кона фалу ащи вешендемань киса, — азонды 14№ идень садонь заведующайсь Татьяна Амбаева.

Конешна, воспитателень тевсь аф тёждятнень эзда. Но Надежда Чугунова вестевок ашезень ноля эсь кядензон, ашезь пеняцякшне сянь лангс, што аф ся профессиять кочказе. Эсь тевонц колга азонды мялень салайста. Надежда Чугунова семботь тиендьсы сянкса, штоба «Теремок» логопедическяй группасонза улель порядка, цебярь дисциплина. А воспитательсь сон Шкайть эзда. Эрь тевть содасы, маштсы. Штоба арамс цебярь воспитателькс, эрявсь лама тонафнемс. Тянь пяк лац шарьхкотькшнезе. Лац няеви, што сон пяк кельгсыне шабанятнень, пяк ялгафты мархтост.

Надежда Николаевна пяк кельгозь азонкшни эсь воспитанниконзон колга. Сембе синь пяк асуфт, аньцек эрть мархта эряви мумс марстонь кяль. И вдь мушенды.

Эсь аф тёждя тевсонза Надежда фалу венеми най минценнети, мокшеннети. Надежда Чугунова пяк кельгсы шачема кяленц и оцю мялец, штоба сон ванфтоволь. А кода ванфтомс сонь, кда аф пачфтемс кяльти кельгомать шабаньконди? Шарьхкотьф, тиемс тянь пяк стака. Сяс самок покодема идень саду мокшавась васенце тевкс эстеенза путозе — сувафтомс шабатнень седис сембе минценнети кельгомать. Иттнень мархта марса синь тонафнихть мокшень стихт, морот, ёфкст, валхт, тиендихть эрь кодама поделкат, куклат, путнихть сценкат, аноклайхть марса мокшень танцти ярхцамбяльхть. А конашкава теест ладяйхть щапне. Пяк кельгсазь иттне щашендомс мокшень нарядснон.

Надежда Чугунова ся ломаттнень эзда, конат аф кельгсазь фкя вастса ащемаснон. Аш мокшавать стама шиц, штоба афоль ётафта иттнень мархта кодамовок рузонь и мокшень кяльса илат. Да и сонцьке вестевок аф лядонды идень садикса, Рузаевка ошса и аймакса ётафневи пялькстоматнень и илатнень эзда, фалу примай эсост участия и сатни аф кальдяв результатт. Народнай налхкоматне, мокшэрзянь щапне, моротне, потешкатне, прибауткатне, валмуворксне, нюрямонь моротне, содама ёфксне, ёфксне и лама мезе лия ноляй тевс воспитательсь. Эрь темать арьсекшнесы лац-ряц, крхкаста, стане, штоба сон салалезе эрь иднять мяленц.

— Мзярда сань покодема тяза, шарьхкодине — тя тевсь монне. Шабатне лездыхть юкстамс сембе ризфнень-пичефкснень. Кодак аньцек суван ёткозост, варжакстан валда цятконяса пиндолды сельмозост, эзк нльне сярятьфозе сетьмоси. Иттне кельгсазь мялень салай мероприятиятнень. Каршек аф ащихть родительхневок и садиконь оцюнясь Амбаева Татьяна Дмитриевна. А мзярда кирдьсазь ширецень, сяда тёждя покодемс, илань ётафтомс.

Иттненди эрявихть тонафнемс и содамс атяснон-бабаснон культураснон. Шабатнень воспитандамаса ламось ащи сянь эзда, кодама ломатть перьфкаст. Теест азонкшнема республикать и Рузаевка аймакть колга, сяс мес синь тяса эряйхть. Пачфтема, мес синь тяфта лемнесазь. Иттне содасазь, што мордвась — тя нация, кона тиендьсы Мордовиять коренной населениянц и явондови основной кафта группава — эрзят и мокшет. Минь аф аньцек ётафнетяма эрь кодама илат, конатнень пингста тонафнесаськ мокшэрзянь койхнень, но тяда башка оцю мяль шарфнетяма мокшень кяльть тонафнеманцты. Шабатне фалу пара мяльса морайхть морот и азондыхть стихотвореният мокшень кяльса. Сембода оцю казнесь тейне — иттнень кельгомасна, — корхтай Надежда Николаевна.

Рузаевкань 14№ идень садса 2015-це кизоня панжевсь краеведческяй этнокультурнай уженя «Мокшень куд». Сонь тиезь сянкса, штоба шабатне содалезь, кода Мордовия Республикаса эрясть атянь-атясна, бабань-бабасна, кодаптольхть кудботмосна, мезьста ярхцсесть, мезе щашендсть лангозост. А тя сембось, кода содави, няфтеви сире пингонь щапнень-каряпнень, бытонь предметтнень вельде.

— Тя музейть панжемста тейнек пяк лездсть Рузаевкань 14№ идень садонь воспитательхне, покодихне, шабатне и синь тядясна-алясна. Кудстост и шачема-касома сире велестост синь каннесть лама экспонатт, конатнень кочказь и тяниень пингс пачфнесазь велеста-коста, тарксесазь бабаснон арзяста. Историяти лемтьф уженяса сидеста ётафневихть занятият, штоба шабатне афолезь юксне минценнеть, содалезь кунардонь пингонь мокшэрзянь койхнень, илатнень, щапнень, — азонды Надежда Чугунова. — Иттне эрявихть касфтомс шачема масторонь кельгикс. Шабать патриотическяй воспитандамац — педагогическяй стака процесс, конань эса башка вастть занцесы итть нравственнай мялензон-арьсеманзон виияфтомасна. Патриотическяй воспитандамась — тя Родинати кельгомать, теенза преданнайкс улемать, инксонза ответственностень и гордостень марямать, сонь панчфокс-панжеманц инкса трудендамать колга мяльхнень эвондафтомасна. Тя сембось сявонди ушеткс нинге эста, мзярда стирнясь или цёранясь аф якайхть школав.

Педагокнень и тядятнень-алятнень васенце тевсна — коль сяда рана эвондафтомс иттнень эса шачема-касома модати, кудти, идень садти и ульцяти оцю кельгомать. Штоба шабатне маряльхть гордость Мордовия Республикать сатфксонзон инкса, и прянь вятемасост улельхть стама ширет, конат лездыхть арамс эсь странань достойнай ломанькс. Патриотическяй воспитандамаса сатфкст сатовихть аньцек эста, кда синць оцюфне кармайхть содама и кельгома эсь уженяснон, эсь ошснон и аймакснон историянц.

Кенярькшнян, мзярда ульцяса-коса васьфнесайне шабанень, конат тячи тонафнихть ни школаса или университетса. Синь мяляфтсамазь, фалу шумбракснихть и пара мяльса лятфнесазь марса ётафтф пингоньконь. Синь тядясна-алясна стане жа аф юкснесамазь, гайфнихть тейне воспитателень шиста, поздравляндакшнесамазь лия илатнень мархта, азонкшнихть сюкпря покодемазень инкса. Синь валсна кошяряйхть покодемс сядонга лама виень-эрьгянь путнезь.

Аф сёпса, кой-коста сизсян, пяк сизсян, но вестевок ашезь эвондакшне мялезе кадомс воспитателень тевть. Сай шобдавась, и мон тага пара мяльса эряскодан кельгома идняненди, — поладозе Надежда.

Надежда Чугунова мокшавакс наряжакшни аф аньцек занятиятнень, но и ламоц пуромкснень пингста (научно-практическяй конференциятнень и семинархнень эса, конат лемтьфт мокшэрзятнень культураснонды) . Эсост примси участия оцю мяльса, тиенди выступленият, ётафни мастер-класст. Лама киза седикс-ваймокс покодеманкса аф весть казендевсь грамотаса и благодарственнай сёрмаса.

16-це апрельста васьфневсь мокшень и эрзянь кялень Всероссийскяй шись. Тядде Рузаевка аймаконь Оцюнясь Александр Борисович Юткин отмечазе мокшавать Надежда Николаевнать Благодарностьса. Тя кизоть Надежда Чугунова арась призеркс номинацияса «Лучшие практики развития родной речи детей дошкольного возраста» Всероссийскяй профессиональнай сяськомаса «2026 кизонь родной кялень и мокшэрзянь литературань инь цебярь тонафтысь».

Лопанять аноклазе Надежда ПОДЛИПАЛИНА