Васенце вастса — боецненди лездомась!
Оцю кепотьксокс Мокшэрзянь народть межрегиональнай общественнай организациянц исполкомонцты ащи Сургутса эряй мокшалясь, минь земляконьке Трускляй велеста Геннадий Сергеевич Наркаев. Сон ламоксть арнесь СВО-в и усксесь боецоньконди гуманитарнай лезкс, штоба пяшкодемс синь боевой задачаснон.
Сембонди содаф, што тя грузть кочкамац, тевсь аф тёждятнень эзда. Но кда кярьмоди тяфтама мокшалясь, кода Геннадий Сергеевич, кодамовок сталмотне аф марявихть. Сон тя эрявикс тевть тиендьсы аф казненкса, аф шнама валонкса, а сянкса, што сединек-ваймонек боецоньконь мархта. Сон афкуксонь патриот, Родинань кельги аля. А тяфтама ломаттне лиякс аф маштыхть.
Геннадий Наркаев шачсь и кассь Рузаевскяй аймаконь Трускляй велеса. Школать аделамда меле эряфонь киц пачфтезе сонь Тюменскяй областень Сургут ошу. Геннадий Сергеевич ся ломаттнень эзда, конат аф кельгсазь фкя вастса ащемаснон, фалу вешендихть и мушендыхть эстеест од тефт.
Тяни Геннадий Наркаев Ханты-Мансийскяй Автономнай округонь Тюменскяй областень Сургут ошень «Масторава» мокшэрзянь культурнай обществать председателец, коза тяни сувси ведьгемоньшка ломань. Сон вяти тостонь мокшетнень и эрзятнень мархта оцю тев койхнень-обуцятнень ванфтомаса. Лия народонь общественнай организациятнень мархта ётафневихть лама эрявикс оцю илат. Тяфта жа Геннадий Мокшэрзянь народть межрегиональнай общественнай организациянц исполкомонц членоц. Аф сидеста, но мзярда мушенды пинге, сон сашенды Мордовия Республикав.
Аф ваномок эсь заняфшинц лангс, мокшалясь вестевок аф юкснесы и шачема-касома веленц. Трускляень средняй общеобразовательнай школаса Геннадий Наркаев фалу учсеф инжи.
Тяса сон васьфни содафонзон и ялганзон мархта, азонкшни сянь квалма, кодама тефт вяти и ётафни мероприятият Сургутонь мокшэрзятнень мархта.
Ётай кизоть Геннадий Сергеевич тяфта жа ульсь Мордовия Республикаса, мзярда Саранск ошса ётафтовсть оцю илат — «Мы вместе!» национальнай культурань и креативнай индустриянь од ломанень III Всероссийскяй фестивальсь и «Шумбрат» межрегиональнай национальнай фольклорнай илась.
— Тяни Сургутса мокшэрзяда аф сяшкава и лама. Ингольдень кизотнень ульсть комсомольскяй стройкат, и ломаттне семьянь сашендсть тяза эряма, покодема. Нолясть юрхт Сургутонь модати, — азондозе Геннадий Наркаев.
Тяниень пингть мокшаляти васенце вастса ащи специальнай военнай операцияти оцю лездомась. Гуманитарнай груз мархта СВО-в сон якась кемоньксть ни. Геннадий Наркаев васьфнесь боецоньконь мархта, сотцсезень мяльснон-арьсемаснон, кизефнезе, мезе теест эряви.
Кодама аньцек лезкс ашезь пачфне Геннадий боецоньконди: ярхцамбяль, маскировочнай сетть, окопнай штатолхт, мотоциклат, квадроциклат, строительнай материалхт, медицинскяй препаратт, а тяфта жа воиттненди эрявикс щамбяльхть-месть. Тя тевса лездыхть аф аньцек мокшэрзятне, но и Сургутонь сембе эряйхне. Ширеса ащихть тя тевса аш.
Тяддень 15-це январьста Сургут ошень мокшэрзятне прважасть СВО-в тага фкя гуманитарнай лезкс — кафта машинат. Тянь квалма Мокшэрзянь народть межрегиональнай общественнай организациянц исполкомонцты пачфтсь Геннадий Наркаев. Тя оцю и цебярь тевть няезь Мордовиянь эряйхне. Вов мезе азсь общественнай организациянь председательсь, филологическяй наукань докторсь Юрий Александрович Мишанин:
— Васендакиге, пара валхт мялезе азомс сонцень Геннадий Сергеевич Наркаевонь колга. Сон афкуксонь мокшаля, оцю патриот, шачема ширень кельги ломань. Сембонь тиендьсы сянкса, штоба Сургутсовок кайголь кяленьке, ванфтовольхть коеньке-обуцяньке. Сон пяк лама тии СВО-ти лездомаса. Мокшэрзятнень и лия национальностень Сургутонь ломаттнень мархта гуманитарнай грузда Геннадий Сергеевич прважась и усксь передовои пяк лама. Тяфтама ломаттне ульсть и лядсть тееньк цебярь кепотьксокс, прянь шнафтома вастокс.
— Марстоньшиса — минь лама национальностень народоньконь пефтома виец. Тя вийть мархта сяськондезь вракнень минь атянь-атяньке. Мархтонза сяськсаськ синь миньге! — азозе меколи Геннадий Сергеевич Наркаев.
Велеса инь эряфкшу ломанць
6-це февральста 93 кизонь шачема шинц васьфтьсы Россиянь журналистонь Союзонь членць, «Рузаевскяй газетать» аф штатнай корреспондентоц, тылонь тружениксь, трудонь ветеранць, Рузонь Баймак велень эряйсь Василий Кудашкин. Василий Максимович эсь материалонзон эса оцю мяльса азондсь велень ломаттнень и шачема-касома веленц квалма. А тячи монь мялезе пачфтемс эряфкшу мокшалять эряфонь кинц колга.
Васенцеда Василий Максимович Кудашкинонь няине 2012-це кизоня, мзярда сань покодема «Рузаевскяй газетав» и тиендине аф кеме аськолксонень редакцияса. Эста и содайне, што Василий Кудашкин лама киза ни аф штатнай корреспондентоньке. Минь ушедоме мархтонза марса кирдема кеме соткст и покодема. Тейне редакцияв Василий Максимович кармась кучсема сёрмат материалонзон мархта, а мон синь печатлакшнине «Лихтибря» рубрикасон.
Шачсь-кассь Василий Максимович Ельниковскяй аймаконь Мокшень Масканя велеса. Мзярда шабаль, ушедсь Великай Отечественнай войнась. И теенза рана савсь арамс оцюкс. Аляц, Максим Яковлевич, тусь эряфста, мзярда цёраняти ульсь 10 кизот. Чахоткать эзда — эста тяфта корхнесть. Мекольце шизонза сон покодсь Велень советонь председателькс.
Ся кизотнень ярхцамс ёфси ашель мезьда. Тядяц, Надежда Михайловна, лядсь колма шаба мархта. Василийда башка семьяса кассть нинге ёмла кафта стирьхть: Анастасия и Прасковья. Василий, кода оцюсь ёткстост, яксесь колхозонь паксятнень ланга. Кочксесь розьбрят и эи модамарьхть тунда, ловть соламдонза меле. Палаксста, капстань и якстеряпсонь лопатнень эзда тядясна пицесь шонгарям.
Ся пингть войнань пингонь иттне ашесть пеняцякшне стака эряфть лангс. Синь седиса и ваймоса шарьхкотькшнезь, што эряви, мезе ули вийса, лездомс фронтти. Якасть школав, коса 3-4 тонафнити сашендовсь фкя книга, тяшнесть кагодонь пакшкятнень лангса. Чернила вастс тевс нолязь ведь мархта шоряф содть.
Василий Кудашкин стихотворениянь и прозаса материалонь сёрмадома ушедсь нинге одста. Васенце сонь заметкац тяштьфоль школаса, сисемце класса, и лемтьфоль тонафнихнень комсомолу примамаснонды. Статьясь ульсь печатлаф Сире Синдру аймаконь «Голос Стахановца» газетаса. Сяльде заметканза лисендсть Ковылкинскяй аймаконь «Путь Ленина» газетаса.
1950-це кизоня Василий ушедсь тонафнема Краснослободскяй зооветеринарнай техникумса «Ветеринария» специальностьса. Шумордазе сонь 1954-це кизоня. Меле направленияс коре сонь кучезь покодема Ичалковскяй аймаконь ветеринарнай участкань заведующайкс.
Но Василий Кудашкинонь учендозе армиясь. Повесткась теенза ашезь учев. Сонць гайфтсь военкомату и эняльдсь сявомс служама. Василий Максимович повсь служама Московскяй военнай округу, Таманскяй дивизияв. Марнек службац ётась сержантонь школаса.
Получамок сержантонь звания, сон командовандась од солдаттнень отделенияснон мархта. Аф весть Василий Кудашкин примсесь участия военнай параттнень эса Москуса, Якстерь Площадьса.
1958-це кизоня Василий Максимович ушедсь покодема ветеринарнай техникокс, а сяльде 12 киза ветеринаркс Ковылкинскяй аймаконь «Красная Пресня» совхозса. Заочна аделазе Н.П. Огарёвонь лемса МГУ-ть, коса получась диплом «Зоотехник» специальность коре. 1966-це кизоня сонь ушедсь покодема хозяйствань главнай зоотехникокс. Марнек «Красная Пресня» совхозса Василий Куашкин покодсь 20 киза. Меле мокшалясь ётась главнай зоотехникокс Рузаевскяй аймаконь «Мир» совхозу (тяниень пингть ООО «Стрелецк»). Эряви азомс, што зоотехникокс Василий Максимович покодсь 44 киза.
Лама киза Василий Кудашкин тяшнесь «Рузаевскяй газетав» заметкат трудонь кельги, фермань и паксянь ломатнень колга: дояркатнень, механизаторхнень, комбайнерхнень…
Василий Кудашкин рьвяясь 1959-це кизоня Антонина Мещеряковать лангс. Кудашкиттнень шачсть ниле идьсна: колма стирьхть и фкя цёра.
Кунара ни сон эряй Рузаевскяй аймаконь Рузонь Баймак велеса, кона содаф эсь цебярь, трудонь кельги ломанензон мархта. Василий Кудашкинонь кудонь кенкшенза панжадот сембонди. Сиренятне сашендыхть седикс-ваймокс корхнема, одонь кизоснон лятфнема. Сяда оттне сувсихть ширезонза лезксонкса, советонкса.
Башка мяль мокшалясь шарфни эряфонь шумбра койхненди. Кемокснесы шумбрашинц, тиенди гимнастика. Илять 2-3 вайгяльбе ётни ару кожфса. Касфни перень сёрот, панчфт. Тяда инголе лама киза эряфкшу мокшалясь кирдсь мешт. — Мзярс сатыхть вийне, карман покодема и кемокснема шумбрашизень эса, — корхтай Василий Максимович.
Ванат лангозонза и седице кенярди. Конашкава сон отькорь, машты кядь ломань. Кона тевти тяза кярьмоде, тисы пяк лац.
Лопанять аноклазе Надежда ПОДЛИПАЛИНА