Ноябрьста минь отмечасаськ кельгомада и седиень лямбода пяшксе илать — Тядянь шить, мзярда эрсь эздонк азы лямбе седи валхт эсь тядянцты эряфонь максоманкса, касфтоманкса-тряманкса, виде кис водендаманкса. Улемс тядякс оцюдонга оцю паваз. А кда Шкабавазсь бславасы авать шачфтомс аф фкя шаба, эста, шарьхкотьф, паваздовок авать эряфса ули сяда лама. Тячи минь азонттама мокшавать, кафта стирнянь тядять, МАССР-нь искусствань Заслуженнай деятельть Анна Левинать колга. Анна Яковлевнать лемоц Мордовияса содаф пяк ламотненди. Сон преподаватель, хормейстер, аф фкя киза ульсь «Келу» коллективти руководителькс.

Шачсь-кассь мокшавась 1938-це кизоня 29-це январьста Левжа мокшень велеса. Алянц, Яков Учватовонь, ульсь най ниле класст образованияц. Сон, кода и велень ламоц эряйхне, покодсь Рузаевкань машина киса. Стрелочниколь, поездонь сцепщиколь. Тядяц, Мария Адмакина (тя стирень фамилияц), грамотать ашезе сода. Покодсь колхозса трудонь шитнень инкса, кода корхнихть ламотне «палканянкса».

Тядяц и аляц шачфтсть-касфтсть ниле итть. Тонафнеманц Анна Яковлевна ушедозе Левжань школаса. Но 1947-це кизоня семьясна ётась эряма Рузаевка ошу. Содамошинь кочксема Анна васенда кармась 5№, а меле — 15№ школаса (тяни 1№ С.И. Вандышевонь Россиянь Геройть лемса гимназия).

— Кудоньконь ваксса ульсть баракт, конатнень эса эста эрясть эвакуированнай семьят. Сембе пингс мялезон лядсь Гомельста семьясь. Ёмла комнатаса ащесь рояль, конань эста няине васенцеда. Инголенза озафоль ава, сон няевсь тейне афкуксонь баяравакс. Кой-коста инструментть каршес озафоль кизос коре лацон стирняц. Но мзярда няине, што рояльть инголи озси стирнять бабац — дивандань тянди. Пади, эста васенцеда арьсезевонь профессиональнай музыкать колга, — азонды Анна Яковлевна. — Эряме аф козяста, тядязе и алязе коль покодсть, штоба касфтомс минь. Кирдсть тракс, путнесть пере. Но, аф ваномок тянь лангс, ваймаманди ётка мушендовсь: тядязе содась мокшень лама мора и пяк мазыста морась, а алязе кельгозе кштиманц.

Шачфтынень-касфтынень колга нинге азан вов мезе — синь маштсть лиянь пичефксонь-ризфонь «кулема». Кудсонк фалу мушендовсь васта ломаттненди. 1937 кизоть песта синь вятезь ширезонк 12 кизоса Мария Курилкоть — раскулачендаф и репрессировандаф крестьяттнень стирьснон. Тя стирнясь арась тейнек мала ломанькс, сазоркс и стирькс. Сяльде сон ваннемань. Пара ваймоль, пяк кельгомазь. Лезнесь кудонь тевса. Стака судьбанц колга ули кода тяштемс книга. Великай Отечественнай войнать пингста сявфоль фронту, коса передовойса панцесь кши солдаттненди. Фкя бомбёжкать пингста ранендафоль и Левжав мрдась фкя пильгса. Мазы стирсь, конань сатозе тяфтама зиян, ризнась-лажнась, и тядязе тага кирдезе ширенц. Алязе эста фронтсоль. Несколька кизода меле Мария музе семьянц, но, мзярс шисоль, кирдсь мархтонк соткст.

Рузаевкав эряма ётамдонк меле тядязе и алязе ашесть аще каршек, мзярда вятине кудозонк мархтон фкя класса тонафни ялгазень Сания Ямбаевать, конань тядяц кулось, а аляц ичкозе вастсоль. Стирнясь эрясь пялес вачеда ичкоздень раднянь подвалса. Сания ширесонк ульсь, мзярс ашезь са аляц. Тядязе и алязе нолязь кудозонк эряма и странницатнень. Мархтост явондозь мекольце кши сускомняснон. Тянь ули кода азомс Шкайти верондай Ульяна бабать колга. Мзярда сон кулось, шачфтыне-касфтыне калмафтозь сонь эсь ярмакснон лангс, — мярьгсь Анна.

Пингсь мольсь. Саранскяи музыкальнай училищав Анна Левинать ускозе аляц. Васенце консультациять теенза максозе земляксна, дирижёрсь Иван Резепов. Сон макссь Анна Яковлевнать музыкальнай асушинцты оценка и мярьгсь поступамс дирижёрско-хоровой отделенияв. Анна повсь цебярь педагогонь классу. Специальностть коряс ульсь Дмитрий Загорулько, вокалть — Тамара Ситникова, теоретическяй предметтнень — Георгий Сураев-Королёв, фортепианоть — Ирина Щербакова. Анна Яковлевнать тядяц и аляц верондасть, што кочкаф тевса стирьсна сафтсы. И аляц, ся пингть пяк оцю ярмакта, музыкальнай инструментонь фабрикаста кучфтсь пианина. Аннанди ушедсь од эряф, и пильгонек-прянек сон тусь классическяй музыкати.

Анна Яковлевна ашезь аще фкя вастса и 1962-це кизоня мокшень стирсь поступась М.И. Глинкань лемса Горьковскяй государственнай консерваторияв. Анна Яковлевна пачфтсь аф лама творческяй кинц-янонц колга:

— 1965-це кизоня мон ушедонь покодема Рузаевкань идень музыкальнай школаса. 1966-2018 кизотнень улень преподавателькс Л.П. Кирюковонь лемса Саранскяень музыкальнай училищаса. Педагогонь стажезе — 50-да лама киза. Сяс, васендакиге, мон педагоган, — азонды сяда тов Анна. — Учениконень ёткса ульсть: композиторсь, Мордовия Республикань искусствань Заслуженнай деятельсь Н. Митин, морсихне — Мордовиянь Народнай артисткась Н. Спиркина, Мордовиянь Народнай артистсь С. Плодухин, Мордовиянь культурань Заслуженнай покодись С. Колесникова и ламотне лиятне.

1984-це кизоня тонафтызе, композиторсь Георгий Иванович Сураев-Королёв «максозе» тейне эсь «иденц» — «Келу» ансамбльть. Мярьгсь: «Аннушка, тон мокшават, лац содасак культураньконь, и тон — классическяй образования мархта асу музыкантат. Тейть тя тевса сафтови!». «Келуть» мархта тевти мон максыне сембе вийнень, лама киза улень и художественнай руководителькс, и хормейстеркс, и вокалть коряс педагогокс, и сценаристокс, и костюмеркс, — корхтай Анна Левина.

1985-це кизоня «Келу» ансамбльсь арась лауреатокс од ломанень и студентонь ХII-це Всемирнай фестивальса, кона ульсь Москуса, а 1989-це кизоня теенза максфоль Мордовия Республикань Государственнай премиясь. 1990-це кизоня «Келусь» сатозе II премиянь лауреатонь лемть «Голоса России» I Всероссийскяй телерадиоконкурсса (Смоленск ошса), 1999-це кизоня примась участия Финляндияса ётафтф Финно-угорскяй народонь Всемирнай фестивальса.

— Тя коллективса покодемста мон шарьхкодине, што мокшэрзянь песеннай фольклорсь — тя ся, мезсь тейне афкукс мала и мезть мзярдовок аф кадса. Аф кржа тиень фольклорнай коллектифнень пуроптомаснон инкса: Левжа велень шабань музыкальнай школать видеса «Пайгонят» идень ансамбльть, интернат мархта РДМШ-ть видеса «Лаймоня» идень ансамбльть, кона руководствазень ала арась Финно-угорскяй народонь идень музыкальнай творчестваса Всемирнай фестивалень дипломантокс, а станя жа Л.П. Кирюковонь лемса Саранскяй музыкальнай училищать видеса студенческяй фольклорнай ансамбльть, — азозе Анна Яковлевна.

Анна Левинать семьяц — тя инь мала и кельгома ломаненза, эряфса нежедема вастоц. Мирдец, Валентин Алексеевич Левин, шачемас-касомас коре Ключарева велеста. Специальностьс коре сон инженер. Мзярда Анна Яковлевна покодсь «Келуса», авати сидеста сашендовсь тушендомс гастрольс. Но Анна вестевок ашень таколда, сяс мес содазе, што куду лядсь ломань, конань лангс ули кода надиямс.

— Сон, кода и мон, пяк кельгсы тевонц, конань мархта заняфоль. Мон покодень 80 кизозон, а сон, мзярс теенза ашезь топоде 82 киза. Тяддень июльста ульсь 62 киза, кода марсотама. Кафта стиреньке. Марина Валентиновна и Екатерина Валентиновна — педагокт-музыкантт, фортепианоть коряс преподавательхть. Уноконьке Анастасия — педагог, английскяй кялень тонафты, Сашань — инженеронь специальностец. Но синь тожа получасть музыкальнай содамошит. Ули минь и уноконь иденьке Алиса, — азонды Анна Левина. — Мирдезень мархта минь пяк павазуфтама. Тяни эрятама Саранск ошса Марина оцю стиреньконь пяле. Мон лувондан рузонь классика и духовнай литература, тяфта жа кельгса культурать и искусствать. Мирдезе тожа лувонды книгат и лама пинге ётафни ульцяса, кельгсы якаманц и ащеманц ару кожфса. Тядде кафцьконди топодсь 88 киза, мон шачема шизе 29-це январьста, а Валентинонь — 26-це январьста.

Левжать пяк кельгса и вестевок ашине юксне. Мзярда ётаме эряма Рузаевкав, коль арьсень колганза. Ламоксть мон якань вели ялга, штоба ваномс седити мала васттнень. Тоза калмафт тядязе и алязе, аказе, дуганне, лия радняне.

Фалу кеняртькшнян, мзярда кулендян асу земляконень сатфксснон колга. «Ару лихтибря» фольклорнай ансамбльть мархта кирдян творческяй соткст: ламоксть улень репетициясост, макссень консультацият. И тиендине тянь оцю мяльса! Сембе монь эряфозе лемтьф музыкати и культурати! И марян тянь инкса оцю гордость! — азозе меколи Анна Левина.

Лопанять аноклазе Надежда ПОДЛИПАЛИНА