«Рузаевскяй газетаньконь» тячиень номерсонза пара мяльса азонттама Дарья Амбаевать колга. Мокшень од стирсь аш ни кода шарфты панчфкя лангс: сембе ширде сон шачф-удалаф, мазы, виде ронга, аньцек и корхнелеть мархтонза. Фотографиятнень лангс, коса Даша наряжаф мокшаванякс, коль ванондолеть и ванондолеть.

Содаф, што мокшень стирсь лувондови инь мазыкс марнек масторлангса. А конашкава мазыхть синь щамсна-карямсна! Сявомс хуш сядынгольдень мокшень костюмть, тяфта мярьктяма, атянь-бабань арзяста таргафть. Мзяра вийда, маштомошида путф сонь анокламанцты! Эрь пялькскясь, эрь строчкась салай сельмованф. Аф сяда кальдяв и тяниень мокшень щамсь. Эсонза, мярьгат, сотфт марс эряфонь кафта кинят — кунардоннесь и тяниеннесь.

Национальнай щамса якаманц кельгсы и тячиень героиняньке — эрьгав и отькорь стирсь Дарья Амбаева, кона сембе вастова кенерькшни. Шачсь-кассь сон мокшень и лама идень семьяса, коса национальнайсь фалу ульсь и лядонды башка вастса. Вете шабатнень ёткста Даша сембода ёмлась. Школаса стирнясь ульсь афкуксонь «тяштенякс». Тонафнесь Трускляй велеса и фалу получсесь цебярь оценкат. Вейхксоце классть шумордазе якстерь аттестат мархта.

— Ётай кизоть 11-це классть аделамдонза меле инголен панжевсь эряфонь оцю кись. Школада меле мон поладыне сяда тов тонафнемазень Саранскяень медицинскяй колледжса. Кочкайне «Лечебное дело» специальностть и «Фельдшер» профессиять. Тяни мон ётань омбоце курсс, — азонды Даша. — Колледжса аф аньцек лац тонафнян, но и аф лядондан ширеса ётафневи мероприятиятнень эряфснон эзда.

Мокшень ёню стирсь пяк кельгсы мокшень кяльть. Школаса фалу примсесь участия шачема-касома кялень олимпиадатнень эса. Муниципальнай этапса аф весть лисендсь сяськикс, а Межрегиональнайса — призёркс.

Школаса Даша Амбаева ульсь васенцекс аф аньцек тонафнемаса. Лама киза сон сувсесь Трускляй велень школать видеса пуроптф «Наследники» поисковай отрядти, конань руководителец мокшалясь, патриотсь и тонафтысь Филипп Полынов. Дарья примсесь участия ётафневи сембе пуромкснень эса, аноклакшнесь мялень салай презентацият, видеороликт. Кепотьксонди, шачема-касома кялень Всероссийскяй шити, Семьянь кизоти.

Эрь кизоня, 16-це апрельста, Мокшень и эрзянь кялень Всероссийскяй шиня, фалу ётафневи «Мокшень и эрзянь кяльса диктант» акция. Трускляй велень школаса диктантть тонафнихненди и школань сотрудникненди сидеста ётафнезе «Ученик года-2024» пялькстомать муниципальнай этапонц участницац Дарья Амбаева.

Эряви башка мяль шарфтомс Дашань сёралонзон лангс. Фотографиятнень эса лувихне няйсазь мокшень стирть тя козяшинц, конань сон «пуропнезе» эряфоньберьф.

Дарьянь шачемдонза меле кизонь ётазь, тядяц, Лариса Алексеевна, и аляц, Владимир Парфирьевич, нарафтозь стирняснон шяярензон. И сембе. Ся пингста сявомок Дашань шяяренза вестевок ашесть керсев — 17 киза сон касфнесыне сёралонзон! Синь пяк мазыхть, кувакат и эчкт! Стирсь и сяда тов ёрай ванфтомс тя мазышить.

Ужяленди, колма кизот ётасть, кода эряфста тусь Дашань аляц, Владимир Парфирьевич, кона шачемас коре Сузгярьге мокшень велеста. Тядяц и аляц марса эрясть лама киза. Лариса Алексеевнань улихть колма иденза васенце мирденц эзда (фкя цёрац тяниень пингть служай СВО-са). Нинге кафта итть шачсть Владимир Амбаевонди рьвакс тумдонза меле.

Мокшень семьясь эрясь павазуста. Но эряфть сонцень закононза. Мзярда Лариса Алексеевнань сатозе зиянць, кулось кельгома мирдец, стирец Даша арась теенза васенце лездыкс. Сонга пяк ризнась-ольксесь алянц куломдонза меле, но содазе, што кельгома тядянцты эряви ширень кирди, нежедема васта. Аньцек няйсы, што шачфтыец аварьгоды, моли ваксозонза, ашкордасы, азы седиста моли валхт. И кафцьконь ваймос арай сяда тёждя.

Амбаефнень ули кода лемдемс музыкальнай семьякс. Лама киза Лариса Алексеевна и Владимир Парфирьевич покодсть Трускляй велень клубса. Марса морсесть миртть-рьват: Лариса — кургса, а Владимир — гармонияса. Синь родсост-плямасост лама асу ломаньда. И мзярда пуромкшнесть марса раднянь келеса, мокшень моротне, сиде моронятне и гармониять вайгялец кайгсть кудсост сембе вийса. Сяс ули кода азомс, што Дашати мороти кельгомась ётась тядянь лофцть мархта. Сон нинге шабакс кельгсы сценать, аф визди няфтемс эсь прянц. Шкабавазсь казезе тячиень героиняньконь мазы вайгяльса. Школаса Дарья най примсесь участия ётафневи илатнень и пуромкснень эса — коса мораль, коса кштиль. Сидеста лисендсь сон и эсь велень клубть сценанц лангс.

Стирть ули сонцень щамоц, конань теенза стазь мала ломаненза. Дашать мокшень паляц арзяса мзярдовок аф пулиякшни. Сон сидеста щашендсы нарядонц лама мероприятияс.

Тяни Амбаефне эряйхть Рузаевкаса. Мизь Трускляй велеса кудснон, рамасть ошса квартира и ётасть тоза эряма. Лариса Алексеевна кармась покодема единай дежурно-диспетчерскяй службаса.

Но аф аньцек валса и корхнемаса Даша лезни тядянцты. Аш кода аф азомс и сянь, што мокшень стирсь трудонь кельги, стакада-сталмода аф пели ломань. Ёмластокиге сон лезнель тядянцты кудъётконь и куд пирьфонь тевса. Даша тяса васенцесь: пиди, урядай, ваны арушить мельге. А мзярда эрясть Трускляйса, тундаста сявомок сёксеть самс покодсь оцю переса. Велеса вдь тевда фалу пефтома, аньцек кенерькшнек.

Аф секрет, што тяни од ломаттне, нльне мокшень велеса шачфне-касфне, сяда сидеста корхнихть рузкс. Аф тяфтамотнень ёткста тячиень героиняньке. Даша Амбаева пяк кельгсы шачема-касома кяленц и ошсовок пара мяльса корхни мокшекс. Сон панжада вайме и паронь арьси ломань. Аф стак Дарьянь лама ялгадонза, конатнень мархта оцю мяльса ётафнесы ётка пингонц. Эздост стирть сатомшка. Тя сяс, мес героиняньке корхтафкшу, аф кизос коре крхкат содамошинза, мархтонза фалу сембонди уленди пара. Кода корхнихть, асу ломанць лама тевса сафтсы!

Дарьянь мархта корхнемста мялезон лядсть пяк содаф и ламотненди келькф фкя кинофильмаста валхне, конатнень цютькя полафтолине и азолине тяфта: Дарья Амбаева — студентка, активистка, цебярь ялга, а нинге — мокшень мазы стирь! Эрь тевса оцю сатфкст тейть, Даша! Ульхть шумбра!

Национальнайть ванфтомац — васенце вастса

Мекольдень пингть Мордовия Республикаса оцю мяль шарфневи национальнайти. Шарьхкотьф мес. Вдь эрь народть культурац эсь лацонза питни сядонгольдень коензон-обуцянзон и историянц мархта. Минь регионцонк, а тяфта жа Рузаевка аймаксонк, тиендеви сембось, штоба афоль юма-ара мокшэрзянь народть самобытностец.

Республикасонк и ся региоттнень эса, коса эряйхть мокшет и эрзят, шачема-касома кяльть тонафтоманц и ванфтоманц коряс тефне полафтсть цебярь шири. Тянь ули кода азомс идень саттнень, ошень школатнень, высшай учебнай заведениятнень колга. Мокшэрзянь кяльсь кайги лама вастова и тя кеняртьфти.

Тяниень пингть шарфневи башка мяль синь нолямаснон коряс аймаконь газетатнень эса. «Рузаевскяй газетаса» мокшень кяльса лисенди «Лихтибря» национальнай рубрика. Тядде теенза топодсь 26 киза. Шачема-касома кяльса лисенди лопанясь арась ялгакс сембе кизонь ломаттненди. Велень эряйхнень аф фалу ули пингсна ламос ванондомс телевизор, сяс кулятнень синь сяда оцю мяльса сотцесазь национальнай полосать эса. Аф ваномок сянь лангс, коза пачфтезе Рузаевка аймаконь мокшень ломанть эряфоц, теенза фалу сотцема мезе однясь уленди шачема-касома уженясонза. Тяниень пингть «Лихтибрясь» арась сяда информационнайкс, кулянь пачфтикс ся событияттнень квалма, конат етафневихть минь Рузаевка аймаксонк. Тяса азондовихть культурнай, социальнай, спортивнай, национальнай темас материалхне, политическяй эряфть колга кулятне. Нинге башка мяль шарфневи сянди, што рубрикаса вановихть нароттнень еткса ялгаксшинь соткснень ладямаснон и кемокстамаснон мельге. Вдь тя — инь главнайсь и питнись эряфсонк.

Удалаза кице, «Лихтибря» рубрикась. Надиятама, што морафтыхнень лувкссна аньцек касы и касы.

Лопанять аноклазе Надежда ПОДЛИПАЛИНА