Вете стирьсна — вете павазсна!
Семьясь фалу ульсь и ляткшни инь оцю козяшитнень эзда фкякс. Цебярь кепотьксокс улендсть лама идень семьятне, тяконь лувксса и мокшетнень ёткса. Тянивок эздост арси коль сяда лама.
Сузгярьге мокшень велеса лац содаф Сараефнень оцю семьясна. Иван Фёдорович и Нина Петровна — трудонь кельги кафта ломатть, шачемас коре тястоконнет, кассть кафцьке оцю сокаень-видиень семьяса. Синь састь мяльс пуроптомс эстеест семья 19-це декабрьста 1975 кизоня. Мокша ломаттне марсот вов ни ведьгемонь киза и аф кунара синь васьфтезь зрнянь свадьбаснон. Эряйхть фкя-фкянь шарьхкодезь, ванфтозь и фкя-фкянди лездозь.
Нина Петровна стирь ялганзон мархта школать аделамда меле тушендсь тонафнема Саранскяень техникуму лаборанткакс, но тонафнеманц ашезе адела. Ялганза срхкасть покодема ламповай заводу. Стирсь пельсь лядомс ськамонза оцю и аф содаф ошса, а сяс тусь мельгаст. Тоса сон покодсь вете кизот. А сяльде лиссь рьвакс кельгома ломаненцты.
Свадьбасна ётась тялонь Миколаста. Нина Петровна ульсь афкуксонь рьвяня: щафоль акша паляса, сери кочкяря туфляса, фатаса. Панчф пусмоцкавок ульсь. Кудста велень совету сёрматфтома мирдец Иван сявозе машинаса. Велеса 1970-це кизотнень тя ульсь оцю дива, а сяс лангозонза сельме каясть ламотне велеса.
Свадьбасна ётафтовсь сире пингонь мокшень койхнень мяльса кирдезь и аф фкя ши. Ломаттне якасть кудста кудс, сембе Сузгярьге велень эряйхне гуляндасть пяк весяласта. Семьянь пуроптомда меле мзяра-бди пинге Сараефне эрясть и покодсть Рузаевкаса, а тоса ни мрдасть меки Сузгярьге вели.
— Мезенди эрявсь тушендомс шири павазонь вешендема? Или Сузгярьгсь, коса кафцьке касоме, кальдяв? Аш сяда цебярь и мала ся уженять коряс, коса шачеть, — корхтай Иван Фёдорович.
Эряма вастонди од ломаттне кочказь Октябрьскяй ульцять. Вов тяфта Сараефнень ушедсь марстонь эряфсна.
Кие-бди ункснесы козяшинц ярмакса, кие — пуроптф содамошиса, а ня ломаттнень козяшисна идьснон эса. Семьясь Сараефнень эряфса васенце вастса. Иван Фёдоровичень и Нина Петровнань вете идьсна — вете мазы стирьсна. Васенцекс од полатнень шачсь Надежда стирьсна, мельганза — Марина, а тоса — Галина, Юлия и Елизавета. Тяни ни сембонь синцень семьясна, шабасна. Казсть тядяснонды-аляснонды 9 унокт. Сембе тевсот, вастоват.
— Шкайсь авати макссесы оцю павазть — тядякс улемать! А мзярда эряфса тя лисенди аф весть, а кафксть, колмоксть, нилексть, ветексть, то снярксть тядясь и марясы прянц павазукс, — мярьгсь вете идень тядясь Нина Петровна.
— Алязе инголи пичетькшнесь, мес Шкайсь ашезь макса теенза цёра. А меле азозе: «Сюкпря, мес монь тняра стирезе!» Мес сон тяфта мярьгсь, аф содаса. Улема, лангозонк ванозь кеняртькшни седиец, — азонды стирьсна Марина Русскина.
Иван Фёдорович школать аделамда меле ульсь армияса и эряфоньберьф покодсь шофёркс. А Нина Петровна — и машина ки лангса, и дояркакс, и уборщицакс, и пидикс-паникс школьнай столовайса. Авась кенерькшнесь и покодема, и кудъётконь тефнень ёткса, и лезнесь шабатненди урокснон тиемста, мзярда сят нинге ёмлатольхть.
Сараефне кирнесть ламонь жувата: тракст, тувот, учат, вазнят, куднармотть. И сембе синь мельгаст эряви якамс, андомс-урядамс, аноклама корма. Шобдава стяйхть Сараефне ранакиге и эрязста молихть карду, вдь тефне тиемат покодема васту тумдот инголе.
Васенда шабатнень касфтомаса Нина Петровнати лезнесь тядяц, а тоса ни стирьсна кеподсть-кассть, арасть афкуксонь лездыкс. Синь аф аньцек ваннезь ёмла сазорняснон, но и кудъётконь тевсонга лезнесть.
— Мон монць пяк кельгса пидемазень-панемазень, тонафтыне тянди и стирнень, а тяфта жа штама-урядама, кодама-стама. Лиякс азомс, касфтонь эздост афкуксонь азорават. Тяни макссян эрямань смузь унокненди, — азонды Нина Петровна.
И хуш стирьсна кунара ни кассть и срадсть эсь кигаст, Сараефнень кудсна тячивок шуроста шамонды. Сашендыхть инжикс каникуласта и ваймама шиста уноксна. Аф юкснесазь, гайфнихть телефонца, азонкшнихть эсь сатфксснон колга.
— Минь эряме пяк ладязь, кудсонк ашельхть сялондомат. Алязе вестьке ашезь юватькшне аф минь, аф тядязень лангс. Фкявок кальдяв вал эздонза ашеме куленде. Сон ужялькшнесь эсонк. Мяляфтса, сай покодема вастста, фалу мезень-мезень танцтиняса каванякшнемазь. Да аф най минь, стирензон, но и ялганьконь, конат тя пингть улендсть ширесонк. Тядязе сяда вешфксуволь. Сон тонафтсь эсонк оцювонь эряфти, макссь ётть, — азозе Марина.
— Минь инь оцю козяшиньке — 5 иденьке и 9 уноконьке! Од ломаттненди, конат аньцек пуроптсть семьят или арьсихть тянь тиемс, максстама тяфтама совет: эряви фкя-фкянь аф аньцек кельгомс, но и шарьхкодемс, маштомс простяма. Эста семьяса эряфсь ладяви, ули кеме. И, конешна, шачфнеда сяда лама идь. Сембонди шарьхкодеви, што стиреньке и цёраньке — тя странаньконь вандыень шиц! — мярьгсь Иван Сараев.
Иван Фёдорович и Нина Петровна лама киза ни пенсиясот. Трудовой марстонь стажсна — 90-да лама киза. Да и тяниень пингть тевфтома миртть-рьват Сараефне аф ащекшнихть. Пирьфсост эряйхть и сяват, и сараст. Эрь тунданя Иван Фёдорович и Нина Петровна путнихть оцю пере, коса касфнихть модамарьхть и лама лия касыкст. И кенерькшнихть, сяс мес семботь тиендсазь марса, лац-ряц арьсезь. Пяк лездыхть теест кудъётконь тевса стирьсна и уноксна.
Семьяснон колга аньцек шнамань валса корхнихть Сузгярьге велеса. 19-це декабрьста топодсь 50 киза, кода синь эряйхть марса. Тяниень пингть тя аф сембонди сафтови. Сараефне маштсть. Синь семьяснон улихть сонцень коенза, конатнень кородозь ванфтсазь. Семьянь, кельгомань и вернайшинь шиня Сараефне ульсть казьфт «За любовь и верность» медальса.
Арьсетяма Иван Фёдоровиченди и Нина Петровнанди «налхкомс» нинге лама свадьба и пачкодемс 100 кизоннети, конанди мярьгихть Платинань или Якстерь! Сембе цебярть теенть и кеме шумбраши!
Благовещениясь
7-це апрельста православнай ломаттнень оцю иласна — Благовещениясь, конань колга азонттама алува.
Галлилейскяй Назарет ошса эрясь Дева Мариясь. Мзярда теенза топодсь кемнилие киза, храму сяда тов лядомс ашель кода. Священникне максозь сонь старецти Иосифонди — Мариять ичкоздень раднянцты. Иосиф плотниколь, эрясь аф козяста. Дева Мариясь пялонза улемста сёрмадсь сюреса, сташендсь щапт, лувондсь священнай книгат и озондсь Шкайти. Весть, Священнай Писаниять лувомста, эвондась теенза Архангел Гавриил и пачфтсь куля, што стирсь курок арай тядякс — шачи церац.
— Тят пеле, Мария! — мярьгсь Архангелсь. — Тонь кочканзе Шкайсь. Церацень лемдьсак Иисусокс. Сон ули Шкаень церакс.
Ня валхнень кулемда меле Мария визделгодсь и кизефтсь: «Кода аран тядякс, кда мон стирян?» Гавриил отвечась: «Святой Духсь валги лангозт». Тянь каршес Дева Мария мярьгсь: «Мон — Шкайть ломанецан, кода мярьги — стане катк и ули».
Эстокиге Шкаень кучфсь тусь ваксстонза. Тя событиясь эстоньбере ушедсь лемневома Благовещениякс. Сон фалу уленди 7-це апрельста. Благовещенияста поставайхненди можна ярхцамс калда.
12 апрельста — Очижись
Тундась — тя аф аньцек ловонь солама, нармонень морот, но и Очижись.
Кунардонь пингть ломаттне, самок императорти, каннесть теенза кодамовок казне. Козятне — паршихть, ашуфне — кинь мезец ульсь. Мария Магдалина, конань ульсь аньцек кеме верондамац Иисус Христости, кодамовок питни казне ашезь канда. Императорти сон венептсь ал и мярьгсь: «Христоссь эреклась!» Императорсь дивандазевсь: «Кода эреклай кулофсь? Тянди стане жа стака верондамс, кода и сянди, што тя акша алсь якстерьгоды!»
Мзярс тяфта корхтась, алсь кядьсонза кармась якстерьгодома. Тяфта «Христоссь эреклась!» валхнень мархта казьфоль якстерь васенце алсь. Святой Очижинь шиня христиаттне оцюдонга оцю кенярдема мархта лятфнесазь Иисус Христость эрекламанц, грехфтома эряфонь кинц шачемстонза сявомок крёзть лангса куломанцты. Христоссь вачкотьфоль крёзти иудейскяй Очижинь каршеня.
IV векста азф правилатнень коряс, православнай церькавсь праздновандасы Очижить тундань пяшксе ковда меле васенце недляшиста. Тядде сон ули 12-це апрельста. Православнай церькавсь тянемс эряй Юлианскяй календарть коряс, сяс христианскяй Очижись мзярдовок аф уленди фкя шиня иудейскяй илать мархта. Очижити ломаттне аноклакшнихть ламос: урятцесазь кудснон, пирьфснон, пидихть танцти ярхцамбяль — Очижиста аделсеви Великай постсь, архнихть алхт. Иттне якайхть кудста кудс: «Христоссь эреклась, Христоссь эреклась!» куля мархта. Тянкса азорхне теест макссихть якстерь алхт или конфетат.
Лопанять аноклазе Надежда ПОДЛИПАЛИНА