19-це июньцта ушедсь «Волга — река мира. Диалог культур волжских народов» эрь кизонь Международнай этнокультурнай экспедициясь. Маршрутоц ётась ошева: Саратов — Волгоград — Астрахань — Никольское — Волгоград – Саратов.
Эрь-кодама регионцта участникне пуромсть васенда Саратовса, коса озасть «Фёдор Достоевский» теплоходти и тусть сяда тов Волгать эзга. Тядде мокшетне и эрзятне покодсть ламоц площадкаса кота шит и мрдасть меки Саратову 24-це июньцта.
Теплоходса марса кочкавсть мокшэрзятне Россиянь лама регионцта. Но сембодонга оцю делегациясь, конешна жа, ульсь Мордовия Республикаста.
Международнай этнокультурнай экспедицияса регионцтонк ульсь лама инжи: мокшэрзянь поэтт, учёнайхть, писательхть и журналистт, Мордовиянь национально-культурнай автономиянь лидерхт и представительхть, культурань, образованиянь покодихть, общественнай организациянь вятихть.
А станя жа республикань и Россиянь лия региононь, коса компактнайста эряйхть мокшет и эрзят, государственнай, общественнай, культурань, наукань и спортонь деятельхть.
Рузаевка аймакста экспедицияса примасть участия: Рузаевкань «Тяштеня» идень эстетическяй воспитаниянь (национальнай культурань) центрань педагогсь Светлана Навратова, А.В. Ухтомскяень лемса культурань Центрать оцюняц Елена Биккулова и Мордовия Республикань искусствань Заслуженнай деятельсь, мокшалясь Василий Родионов.
Международнай этнокультурнай XXIII экспедицияса-фестивальса инжихненди анокласть оцю и козя культурнай программа. 20-це июньцта мокшетне и эрзятне пачкодсь Волгоград ошу. Тяса, причалса, ётась лямбе васедема Волгоградскяй областень общественностень и государственнай властень органонь представительхнень мархта.
Мялень салай концерт анокласть тостонь филармониянь артисттне. Синь эздост шири ашесть ляда и миннетне — МР-нь Заслуженнай артисткась Любовь Князькова и од морсись Артём Мамаев. Волгать вельхксса кайгсть мокшень, эрзянь, рузонь моротне. Тяда меле фестивалень участникненди ётафтовсь экскурсия ошть-геройть эзга.
«Волга — река мира» экспедициянь-фестивалень участникне ульсть Волгоградса Мамаев курганца. Синь путсть панчфт, сюконясть и лятфтазь сятнень, кит максозь эряфснон шачема-касома масторснон инкса Великай Отечественнай войнать пингста.
«Волга-река мира» экспедицияса-фестивальса кода фалу фкявок ши аф ётни стак. Поволжьянь ошнень эса улемада башка лама аф фкя лацонь мероприятия ётафневсь теплоходса. Кепотьксонди, ульсь «Защита, сохранение и укрепление традиционных духовно-нравственных ценностей» лем ала важнайть колга корхнема. Сонь вятезе М.Е. Евсевьевонь лемса МГПУ-нь профессорсь, историческяй наукань докторсь Тимофей Надькин.
Священнослужительсь Георгий корхтась семьяса шабатнень касфтомаснон колга, тонафтовихть или аф синь Шкайти кемамати, эсь шачема-касома масторснон кельгома-кородома.
Сяда тов теплоходса экспедициять покодемац поладовсь «У террориста нет национальности и веры» лем ала пуромксса. Теенза вятикс ульсь Н.П. Огарёвонь лемса МГУ-нь юридическяй институтонь директорть заместителец Александр Чебуренков. А специальнай военнай операцияса участвовандаманц колга азондсть ветераттне. Фестивалень участникнень эсь творчестванц мархта аф весть теплоходса пяк кеняртьфнезень МР-нь Заслуженнай артисткась Любовь Князькова.
21-це июньцта «Волга — река мира» экспедициянь-фестивалень участникнень пара валса и кшиса-салса васьфтезь Астрахань ошса. Тяса тожа сембе инжихненди анокласть козя и мялень салай программа.
22-це июньцта делегациясь ётафтсь Великай Отечественнай войнать ушедома шинцты лемтьф митинг. Мзярда кота шись аделавсь, сембе участникне мрдасть меки — Саратов ошу.
Надежда ПОДЛИПАЛИНА
