Мекольдень пингть Мордовия Республикаса оцю мяль шарфневи национальнайти. Шарьхкотьф мес. Вдь эрь народть культурац эсь лацонза питни сядонгольдень коензон-обуцянзон и историянц мархта. Минь регионцонк, а тяфта жа Рузаевка аймаксонк, тиендеви сембось, штоба афоль юма-ара мокшэрзянь народть самобытностец.

Республикасонк и ся региоттнень эса, коса эряйхть мокшет и эрзят, шачема-касома кяльть тонафтоманц и ванфтоманц коряс тефне полафтсть цебярь шири. Тянь ули кода азомс идень саттнень, ошень школатнень, высшай учебнай заведениятнень колга. Шачема-касома кяльсь кайги лама вастова и тя кеняртьфти.

Тяниень пингть шарфневи башка мяль мокшэрзянь кяльхнень нолямаснон коряс ламоц аймаконь газетатнень эса. Минь «Рузаевскяй газетасонк» ковти весть лисенди мокшень кяльса «Лихтибря» («Родник») национальнай рубрика.

Васенце ушедыец и сермадыец ульсь Иван Моисеев, кона башка мяль шарфнесь национальнай тематненди. Велень эряйхнень аф фалу ули пингсна ламос ванондомс телевизор, сяс кулятнень синь сяда оцю мяльса сотцесазь национальнай лопанять эса. Аф ваномок сянь лангс, коза пачфтезе Рузаевка аймаконь мокшень ломанть эряфоц, теенза фалу сотцема мезе однясь уленди шачема-касома уженясонза. Кафксть пара, мзярда тянь ули кода тиемс кельгома кяльса. Вдь куляда лама, но мзярда мезевок морафтат мокшекс, бта радня ломанцень мархта корхтат или кизонь пси шиня кельме ведьта лихтибряста копордат.

Тяниень пингть «Лихтибрясь» арась сяда информационнайкс, кулянь пачфтикс ся событияттнень квалма, конат етафневихть минь Рузаевка аймаксонк. Тяса азондовихть культурнай, социальнай, спортивнай, национальнай темас материалхне.

Лама азондови мокшетнень эряфснон колга, фольклорнай коллектифнень, ансамбльхнень и содавикс семьятнень колга. Нинге башка «Лихтибря» лопаняса оцю мяль шарфневи сянди, што рубрикаса вановихть нароттнень еткса ялгаксшинь соткснень ладямаснон и кемокстамаснон мельге.

Удалаза кице, «Лихтибря» рубрикась! Катк тядянь-алянь кяленьке эряй фалу!

Надежда ПОДЛИПАЛИНА