Рузаевка аймаконь Мокшень Пишля велесь содаф пара вайме, асу и машты кядь ломанензон мархта. Тяса кельгсазь и кородозь ванфнесазь сембе минценнеть — мокшень кяльть, культурать, коеньконь-обуцяньконь. Тянкса лама тиендихть велень клубонь покодихне. Вов и аф кунара тяса ётафтовсь «Семьянь койхне» мероприятия, кона лемдевсь Семьянь кизоти. Илас тертьфтольхть Мокшень Пишлянь эряйхне — шаба мархта семьятне.

Пуромфненди аноклафоль мокшекс наряжаф някань выставка, няфтьфоль «Мокшень семьяса авать вастоц» видео-презентация, азонтфоль Мордовиянь эрь-кодама аймакть национальнай костюмонц колга. Ёмланятненди ётафтовсь дефиле мокшень щамса. Стирнятне-цёранятне пара мяльса наряжакшнесть мокшекс.

Содаф, што эрь велеть ули козя историяц, кона кемоста сотнеф тячиень шить мархта. Мокшень Пишля велеть эряензонды ули мезе пачфтемс Рузаевка ошть эзда кемоньда лама вайгяльбень вастса ащи шачема ширеснон колга. Тяса велеть историянц, а атяньконь-бабаньконь эряфснон колга информациять синь аф аньцек кочксесазь и пуропнесазь марс, но и ванфтсазь, тиендьсазь содафокс народнай искусствать.

Мокшень Пишлянь клубть видеса вов ни мзяра киза мельцек покоди этнокультурнай музей, конань лемоц корхтай эсь инксонза «Тяфта эрясть атянь-атяньке». Сон пцтай аш мезьста кочкафоль велень эряйхнень вийса и синь лезксснон вельде. Тяни, тняра кизонь ётазь, эсонза пяк и пяк лама экспонат, конат келиста пачфнихть мокшетнень ингольдень эряфснон колга.

Кит мокшень оцю семьятнень эса лувондовсть инь главнайкс? Атясь и сонь рьвац — бабась. Синь ульсть «ёнень путыкс» цёраснонды и рьвяняснонды, стирьснонды и овснонды, лезнесть касфтомс унокнень, нльне уноконь иттнень кой-коста ваннезь. Семьятне инголи оцюфтольхть, но сембе эрясть марса, фкя кудса. Кда ни тя или тона цёрась рьвяямдонза меле арсесь вельф самостоятельнайкс, шачендсь лама идец, лац-ряц стяшендсь пильге лангс (улендсь, кудса вастть аф сатнеманц сюнеда), эста ни эсь семьянц мархта ушеткшнесь эряма башка. А мзярс сембонь лангса азоркс ульсть атясь и бабась.

Синь серес оцю, эсь кядьса тиф няка лаца ащихть Мокшень Пишля велень клубть этнокультурнай музейсонза. Атять кядьса гармония, вакссонза ащи мокшавакс щаф-каряф азоравась. Гармонияське эряфкшуть кядьса аф стак. Инголи вдь ашельхть телевизорхт, музыкальнай центрат-месть, а гармонияса морама маштысь сувсесь велень васенце ломаттнень ёткс.

Мокшаватне и мокшень стирьхне сёксень и тялонь иляттнень кштирдсть сюре, кодасть котф, сюреса сёрмадсть панархт-месть. А мокшень «пефтома» моротне ульсть теест тя тевса лездыкс. Мзярс моралезь фкять эздост педа-пес, ваныхть, а покольняфтома виде сюресь ашкодовсь ни тжнай-вжнай кштирти. И вов Мокшень Пишля велень клубть музейсонза башка няевикс вастста ащи сюрень кштирдемань тевса инь эрявикссь — лапась. Кинь ули мялец, тяса няфтьсазь кода учань сейхтьф понась арси сюрекс.

Пянакудсь клубса тиф-мараф аф кирпицьста, ватьф аф сёвоньца, но эрь сайсь няйсы, што пянакудть инголе шарфтыть, эсонза пидить-панить тевоц аф тёждятнень эздоль. Эряви улемс цебярь азоравакс, штоба «сафтомс» пянакудса юрнай толти — анокламс танцти, аф пялес верок, аф шяйф-палф ярхцамбяль. Толсь пянакудса юрналь сембе ширде, фкя пингть анокламась мольфтевсь лама кядьгоса. Эрть эздост эрявсь шарфтомс, ваномс. И тя ёткть азоравась фатнесь фатуттненди. Но мезе тят корхта, а пянакудонь ярхцамбяльхне сембе сяка лисендсть пяк и пяк танцтикс.

Кода пихневсь вайсь? Инголи скалвайть эрь кудса пихнезь синць. Азоравать нинге фкя лездыец — пихтембарнясь. Музейса улихть парнякс ащихть, а ули ниле ужеса. Хуш и шуроста Мокшень Пишляса синь васьфневсть, а сембе сяка ульсть. Вов вельдест и пихневсь кудонь скалвайсь.

Мокшень Пишля велень клубть музеец лац няфнесы мокшетнень ингольдень эряфснон. Шуфтонь вастть лангса толгань понацам, вельхтяф эсь кядьса кодаф вельхтямаса, поталакти повфтаф нюрям. Тяса-тоса ащихть сёвонень сяканят, шаванят, эсост шуфтонь куцюфт. Улихть сюрьхцепт, очкт, сифтепт и лия экспонатт. Музейть экспозицияц коль козякоткшни.

Мероприятиять аделамда меле ульсь этнодискотека. Меколи сембе саф семьятне симсть тишень чайда танцти ярхцамбяль мархта, корхнесть сянь колга, кода тячи синь ванфнесазь сире пингонь койхнень-обуцятнень.

Надежда ПОДЛИПАЛИНА