Журналисттненди сашендови покодемс лама ломанень мархта. Тянь ули кода азомс и «Рузаевскяй газетаса» покодихнень квалма. Кочксетяма информация мокшень велетнень, синь эряйснон колга. И, мзярда киньге мархта корхнемста лятфнесаськ Старошайговскяй аймакть Сире Теризморга велеть, куленттяма квалманза пяк лама пара вал. Фкясь аш ни кода шнасыне тостонь сюреса сёрмадыхнень, нулань-мезень стайхнень, омбоцесь — Шкаенди верондайхнень, колмоцетне шнасазь велеть целайнек: цебярь, кле, тя мокшень крайсь.
22-це майста Старошайговскяй аймаконь Сире Теризморга велеса, Национальнай культурань центраса, ётафтовсь «Велень вайгяльхть» («Сельские голоса) III-це мокшень и эрзянь моронь республиканскяй фестивальсь. Васенцеда сон пуроптозень региононь коллектифнень 2022-це кизоня и лемдевсь мокшень содаф композиторть, Россиянь и Мордовиянь искусствань Заслуженнай деятельть Георгий Сураевонь-Королёвонь шачема шиста 100 кизонь топодемати.
Сире Шайгавонь аймаксь аф стак кочкафоль фестивальти ётафтома вастокс. Тястонь Кулдым мокшень велесь Г.И. Сураевонь-Королёвонь ёмла родинац, тяса сон шачсь и касозе серенц. Кельгозе сон и Сире Теризморгать. Георгий Иванович най корхнекшнесь: «Мзярда пяк сизсян или мезсь-бди монь аф лисенди — кадондсайне сембе тевнень и тушендан Сире Теризморгав. Тяса эрь кудса морсихть. Кулхцонкшнемок ня моротнень, мон лама пингонди пуропнян вийхть-эрьгат».
Тядде участникнень географиясна сяда кассь. Фестивальть эса примасть участия Мордовия Республикань кемгафксува аймаконь 16 фольклорнай творческяй коллектифне и Саранск ошень самодеятельнай вокальнай коллектифне, народнай моронь и семейнай ансамбльхне, солисттне-вокалисттне, конат морсесазь Мордовиянь содаф композиторть Г.И. Сураевонь-Королёвонь произведениянзон.
Национальнай культурань центрать перьфоц тя шиня «шарсь» лама тюсса панжи панчф лангс: аймакста саф коллектифне морасть шачема-касома кяльса морот, морасть гармонияса, салазь инжихнень мяльснон мазы щамснон мархта.
Сцена лангса ульсть и Рузаевка аймаконь артисттне. Кядень кайги цяпамаса васьфтьфтоль Палаевка велень (мокшекс мярьгихть «Цифтамаз») «Марлюня» коллективсь. Цёфкс лаца мазы моросна пяшкодезь марнек залть.
Палаевка мокшень велесь кунара содаф трудонь кельги, морама машты, инжиень примай, каваняй ломанензон мархта. «Марлюня» ансамблень участникне няфнесазь пряснон оцю и емла сценатнень лангса. Мяльс тушендыхть сиде моронясна и сире моросна. Коллективсь примси участия «Шумбрат, Мордовия!» фестивальхнень, народнай творчествань илатнень и смотратнень эса. Тяда башка, концерт мархта участницатне якайхть шабрань аймакненди. И фалу оцю мяль шарфневи национальнай щапнень-каряпнень лангс, конат салсихть мяль мазышиснон мархта.
Тяда башка, «Велень вайгяльхть» фестивальса оцю инжикс ульсь «Келу» фольклорнай ансамбльсь, конань пуроптозе мокшэрзянь содаф композиторсь Г.И. Сураев-Королёв, и кона тячемс каннесы сонь лемонц и ащи Мордовия Республиканьконди «визитнай карточкакс.
Эряви азомс, што «Велень вайгяльхть» фестивальть пингста пуроптовсть сувенирнай продукциянь выставкат, инжихненди ётафтовсь мялень салай экскурсия Национальнай культурань центрать эзга. Мероприятиять аделамда меле фестивалень сембе участникне казьфтольхть дипломса и мяляфтови казнеса.
Надежда ПОДЛИПАЛИНА
