Саранскяйса ётафтовсь «Кодамо моро минь моратано…» VI Межрегиональнай фестивальсь-конкурссь. Мероприятиять пуроптозь-ётафтозь Н.П. Огарёвонь лемса МГУ-нь Национальнай культурань институтсь, Финно-угорскяй народонь культурань Поволжскяй центрась МР-нь Культурань, национальнай политикань и архивнай тевонь Министерствать ширень кирдеманц вельде.
Моронь тя иласа примасть участия Мордовиянь аймакнень эзда, Саранскяйста и Пенза аймакста творческяй коллектифт, артистт, конат морсихть фольклорнай морот, ванфнесазь морамань традиционнай культурать. Сценать лангста кайгсть мокшень, эрзянь и рузонь морот.
Фестивалень-конкурсонь Гран-прить сатозе Рузаевкань Иттнень эстетическяй воспитанияснон коряс центрань «Тяштеня» вокальнай ансамбльсь (руководительсь Анна Ивановна Тишкина).
А «Валдоне» вокальнай ансамбляста шабатне (руководительсь Наталья Васильевна Чекашкина) арасть II степенень Лауреатокс. Лия участникне казьфтольхть дипломса и казнеса.
Эряви азомс, што Рузаевкань Иттнень эстетическяй воспитаниянь (национальнай культурань) «Тяштеня» центрась — тякось Мордовия Республикаса, коса мокшэрзянь культурать мархта содафневихть шабатне. «Тяштенясь» содаф аф аньцек регионцонк, но и омба масторсовок. Тядятне-алятне вятнихть тяза аф аньцек рузонь итть, но и лия национальностень стирнят-цёранят.
Шабатне сашендыхть вокальнай, художественнай, декоративно-прикладной творчествань, бисероплетениянь кружокненди.
Аф кржа идня сашенды «Школав анокламась» урокненди. Синь видесост педагокне азондыхть иднятненди мокшэрзянь крайть колга, тонафнихть морот, стихотвореният. Шачема кяльть ванфтомац тяса — васенце вастса.
— «Тяштеня» идень центрась панчфоль 2008-це кизоня. Эсонза и эста, и тянивок покодихть эсь тевонь содай ломатть.
Тяниень пингть нинге сяда оцю мяль эряви шарфтомс сянди, штоба шабатне содалезь и кельголезь аф аньцек эсь, но и лия нароттнень культураснон, ладязь эряльхть, шарьхкодельхть и лезнельхть фкя-фкянди. Эста народоньконь и странаньконь кармай валда сай пингоц, — азозе Иттнень эстетическяй воспитаниянь (национальнай культурань) «Тяштеня» центрать директороц Анна Тишкина.
Надежда ПОДЛИПАЛИНА
Ветеце майста — Очижись
Пингсь содай молеманц. Омбоце ковсь ни ульцяса азорондай тундась, шиста шис эреклафнесы перьфпяльть. Сяда сидеста и коль сяда лямбоста эжди шинясь, а шуфтонятне ни щазь эсь сянгяря щамснон. Тундась — инь цебярь и кельгома пингсь. Но тя аф аньцек ловонь солама, нармонень морот, но и Очижись.
Тядде сон ули 5-це майста. Ломаттне аноклакшнесть ламос: урятцезь кудснон, пирьфснон, сташендсть од щапт. Азораватне аноклайхть танцти ярхцамбяль — Очижиста аделсеви Великай постсь, архнихть алхт. Тя шиня аф покодема. Иттне якайхть кудста кудс «Христоссь эреклась, Христоссь эреклась!» куля мархта, тянкса азорхне теест макссихть якстерь алхт или конфетат.
Очижинь недялясь аделави «Краснай горкаса» — Очижида меле васенце недляшись. Тя шиня улендихть лама рьвяямада, сяс мес «Краснай горкась» лувондови инь павазукс од семьянь пуроптыхненди.