Кельгсазь мокшэрзянь крайсонк гармониять. Сонь морамац кепсесы мяльцень, токсесы седицень, максси од вийхть, эрьгя. Вов мес республикасонк эрь кизоня «Морак, гармония!» фестивальса-конкурсса участвовандай тняра ломань. Тяфта ульсь тяддевок. Фестивальть-конкурсть отборочнай этапонзон эса примась участия колма сятта лама ломань.

Аф кунара Мордовия Республикать сембе уженянзон эзда инь асу гармонисттне, ансамбльхне, сиде моронянь морайхне пуромкшнесть «Морак, гармония!» народнай творчествань республиканскяй пялькстомать Гала-концертозонза. Фестивальть финалоц удалась сембе ширде. Тядде сон лемтьфоль Семьянь кизоти.

Гала-концертть ушедомда инголе, Культурань республиканскяй Дворецть фойесонза пуромкшнесть музыканттне и ваныхне. Гармонисттне маштозь люпшнезь гармониянь пунятнень, а инжихне морасть и кштисть народнай инструментть коряс. Пуромкссь арась эсь лацонь илакс республикань эряйхненди. Залса, кода корхнихть, марьти ашель коза прамс, сембе васттне заняфтольхть.

— Касфни мяль, мес вов ни комсь киза фестивальсь пуропнесыне республикань сембода цебярь гармонисттнень. Синь казендихть тейнек пара мяльхть-арьсемат, лезнихть юкснемс эряфонь стакатнень-сталмотнень колга. Мялезе азомс сюкпря организаторхненди, велень Культурань кудонь руководительхненди и покодихненди эсь тевснонды преданнайкс улеманкса, — приветствовандазень Гала-концертонь участникнень и инжихнень МР-нь культурань, национальнай политикань и архивнай тевонь министрть васенце заместителец Александр Губанищев.

Сценать лангса тя шиня кайгсть мокшень, эрзянь, рузонь морот, сиде моронят, наигрышт, эряфть, кельгомать, шачема-касома уженять цебярь ширензон, тяниень пингонь прябалатнень колга инструментальнай композицият. Артисттне морасть лама патриотическяй мора. Ваныхнень ашесть кирдев сельмоведьсна моротнень кулхцондомста, конат лемтьфтольхть сятненди, кит тяниень пингть передовойсот.

Оцю сценать лангса ульсть и дугаттне-кафтасьне, Рузаевка ошень эряйхне, Юрий и Владимир Келиттне. Гармониять мархта синь ялгат нинге шабакс. Васенцекс музыкати сась Юрий. Ичкоздень 1991-це кизоня фильмань ваномста сон кульсь мора, кона токазе седиенц и сась мяльс тонадомс морамс сонь.

— Сембе содасазь, што 90-це кизотне стакатольхть. Дуганозень мархта кочксеме сюлекат, штоба меле ярмакть лангс рамамс гармошка. Мархтонза молень музыкань учителезти, Николай Васильевич Шичкинонди, и эняльдень тонафтомс монь морама, — лятфнесы Юрий Келин.

Пингонь ётазь Володявок шарфтсь мяль гармонияти. Браттне ушедсть выступандакшнема школьнай, меле эсь аймаконь мероприятиятнень эса, а сяльде лиссть республиканскяй уровеньц. Тяни кафцьке морсихть «Мокшень алят» эстраднай коллективса. Келиттне няфнесазь маштомошиснон лама конкурсса, коса занцихть призовой вастт. Маластонь пингть дугаттне срхкайхть СВО-нь ётафтома васттненди, штоба кеняртьфтемс боецнень морамаснон мархта.

Кода няевсь пялькстомать пингста, народнай инструментсь кельгови аф аньцек эряфкшуфненди, но и оттненди и шабатненди. Сценать лангс лисихнень ёткса ламоль идьта.

Сембе сяськихне «Морак, гармония!» фестивальса-конкурссаказьфтольхть башка номинациява: «Гармониять коряс моронь, сиде моронянь морай», «2024 кизонь инь творческяй семьясь», «Гармонист-аккомпаниатор», «Морай гармонист», «Гармонист-любитель» и стак тов.