Эхи мазыхть мокшень стирьхне,

Сяда мазыхть аф муят…

Ня строчкатне сявфт Мордовиянь Заслуженнай поэтть Раиса Константиновна Орловать валонзон коряс мороста, и мархтост аш кода согласиндамс. Мокшень стирьхнень удалафшиснон квалма нинге кунардонь пинкнень тяшнесть мянь омба масторонь ученайхне. Тянивок ширезонк сашенды инжихне шарфнихть мяль аф аньцек шама путксс, ронгс-пондс коре мазышиснонды, но и шнашендсазь синь эрь кодама тевса асуснон, машты кядьснон. А кодама дивандай сельмованф прафнихть стирьхнень мокшень щамснон-карямаснон лангс! Тячи минь оцю мяльса содафттядязь минцень аймаконь мазы стиреньконь Анастасия Резеповать квалма.

Аф кунара «Мокшень правда» газетаса ётась «Мазыхть мокшень стиреньке» конкурссь. Синь фотографиясна ульсть печатлафт газетаса, и эряви азомс, што сембе участницатнень мазышисна ашесть када озадонь седихть ащема фкявок мокшэрзянь ломань минь Мордовия Республикасонк. Тяфтама мяльсна и омба масторонь инжихнень, конада регионцонк мекольдень кизотнень уленди аф кржа.

Аф фкя лацонь пуромксса мархтост корхнемста сотцеви, што мокшень стирсь лувондови инь мазыкс марнек масторлангса. А конашкава мазыхть щамсна-карямсна! Сявомс хуш сядынгольдень мокшень костюмть, тяфта мярьктяма, атянь-бабань арзяста таргафть. Мзяра вийда, маштомошида путф сонь анокламанцты! Эрь пялькскясь, эрь строчкась салай сельмованф. Аф сяда кальдяв и тяниень пингонь мокшень щамсь. Эсонза, мярьгат, сотфт марс эряфонь кафта кинят - кунардоннесь и тяниеннесь.

Мокшень щамть мазышинц колга можна корхнемс пефтома. А тяни эрьда мрдатама конкурсти. Афкукс, сембе ширде удалафт мокшень стиреньке-баяраваньке. Казезень синь Шкабавазсь аф аньцек мазышиса, но и макссь теест асуши, эрь-кодама тевса машты кятть. Ламоц мокшэрзянь стирьхне примасть тя конкурсса участия. Кучсесть редакцияв фотографият, коса синь наряжафт национальнай щамса. Снимкатнень тиендезь и «Мокшень правда» газетань редакцияса.

Конкурсса примасть участия кемонь стирьхть: вейхксотне Мордовияннет, фкясь Пензенскяй областенне. И вов сась пинге кочкамс ёткстост инь мазыхнень и асуфнень. Васенце вастть занязе Ковылкинскяй аймакста Дарья Лунькова, омбоце вастти лиссь Рузаевка ошста Анастасия Резепова, колмоцети - Старошайговскяй аймакста Алина Пониматкина.

Рузаевка аймаксь. Мзяра содаф асу и ёню ломань шачсь-кассь тя модать лангса: РФ-нь и МР-нь Народнай артисткась Мария Антоновась, поэтсь, журналистсь, СССР-нь Писателень союзонь членць Николай Учватов, МР-нь Заслуженнай артисткась Инна Учватовась, ученайсь, экономикань и философиянь наукань докторсь, профессорсь Василий Ельмеев, мокшень поэтсь, тонафтысь Григорий Ельмеев и ламоц лиятнень эряфонь кисна ушедсь тяса.

Асу ломаньца козя тя вастса шачсь и тячиень героиняньке 11-це классонь тонафнись Анастасия Резепова. Эряви азомс, што Настя кассь мокшень семьяса, коса минценнесь, национальнайсь фалу ульсь и лядонды башка вастса. Резепофнень кудса аф лоткси кайгомда мокшень кяльсь и моротне.

Стирть тядяц-аляц, Александр Дмитриевич и Антонина Владимировна, синць пяк кельгсазь мокшекс корхтамаснон, кельгомасна ётась идьснондывок. Сяс и стирняське кассь эсь национальсностень кельгикс, кородыкс.

Семьясь ванфнесыне сире койхнень-обуцятнень, илатнень, марса морсихть мокшень морот, пицихть-панихть национальнай ярхцамбяльхть. Настясь виденцясь, што кургоняда и пачада танцтиня теенза мезевок аш.

Шабакс пингстокиге сон шарфтсь эсь лангозонза мяль покодемати оцю кельгоманц мархта. Тячиень героиняньке эряй Рузаевка ошса, тонафни школаса. Тонафнемась макссеви теенза тёждяста, пцтай сембе предметтнень коряс сявонди «ветет». Эряви азомс, што Настять ули сёрмадыень асувоц. Сон тяшни эрь-кодама информацият, статьят, зарисовкат-месть АНО «ИАР «Рузаевские новости» газетав.

Тя изданиясь сяськсь Президентскяй грантонь фондть конкурссонза и ушедсь ётафнемонза эряфс «Медиаволонтёры Рузаевки - сила добра!» проектть. Настя сувась целевой группань тонафнихнень лувксс, примась участия «Инь цебярь медиаволонтёрсь» конкурсса и эстоньбере арась газетать мархта цебярь ялгакс.

Ёню стирсь тяшни аф фкя лацонь темас коре. Салсесы мяленц журналистонь профессиясь, сяс школада меле арьсекшни поступамс Н.П. Огарёвонь лемса МГУ-нь «Журналистика» отделенияв и сотнемс сёрмадыень тевть мархта сай пингонь эряфонц.

Ётай кизоть АНО «ИАР «Рузаевские новости» омбоцеда сяськсь Президентскяй грантонь фондть конкурссонза и ушедсь ётафнемонза эряфс «Добро во благо» проектть. Тя кизоня Анастасия арась сяськикс Мордовия Республикань од журналистонь конкурсса «Медиаволонтёр-2023»/«Медианаставник-2023» специальнай номинацияса «Зрнянь вайгяль» («Золотой голос»). И монь пяк мялезон, што сонь наставникокс арань мон.

Анастасия Резеповась - эрьгав и отькорь стирь, сембе вастова кенерькшни. Сон «Васенцетнень Движениясна» од ломанень организациянь активистка, примси участия ётафневи сембе мероприятиянзон эса аф аньцек эсь республикасонк, но и лия регионцовок. Меля, кепотьксонди, ульсь мянь Владивостокса. А нинге героиняньке РФ-нь Президентть видеса шабать праванзон коряс Уполномоченнайть видеса идень Федеральнай общественнай советонь член!

Тонафнемась и общественнай тевсь занцихть лама пингта, сяс стак ащекшнемс Настяти ёфси аш мзярда. Кда эвондакшни ётка пингоц, сон пара мяльса васетькшни ялганзон мархта. Эздост стирть сатомшка. Тя сяс, мес героиняньке корхтафкшу, аф кизос коре крхкат содамошинза, мархтонза фалу уленди интересна.

Кассь Настя отькорь, пара вайме, ёню шабакс, эрь кодама тевса сатнесы. Машты лиятнень мархта марстонь кялень мушендома, сон цебярь ялга, эсь пингстонза максси эрявикс и питни советт.

Каникулатнень пингста Настя най уленди Хованщина велеса, щаванц-щятянц ширеса. Лезни сиренятненди перень, куд пирьфонь и кудъётконь тевса. Машты стирсь кячкаскаса (крючокса) кодама. Тянди сонь тонафтозе щавац, Нина Ивановна. Тялонда героиняньке кельгсы соксса и конькаса курькснеманц. Тянь Резепофне тиендьсазь семьянь келеса.

Настя пяк кельгсы мокшень щамть, пара мяльса наряжакшни мокшекс илас-коза. Национальнай нарядсь, кода няйсаськ снимкатнень эзда, теенза пяк ладяй.

Эсонза лама отькорьшида и эрьгада. Пяк ни кельговихть теенза мокшень моротне, кельгсы сон и мокшень шачема-касома кяленц и пяк ризнай ванфтоманц инкса.

- Кельгса шачема-касома кялезень! И ёфси аф виздян корхтамс мокшекс. Аф шарьхкотькшнесайне ся ломаттнень, конат аньцек сашендыхть ошу, эзк рузыякшнихть. Аф эряви сёпондомс, вдь кяльсь - тя минь козяшиньке, - корхтай Анастасия Резепова.

Надежда ПОДЛИПАЛИНА